كيف تصنع الزبادى فى المنزل

بســــــــم الله الرحمن الرحيم

النهاردة عايز اعلمكم ازاى تعملوا الزبادى فى البيت باسهل واسرع الطرق وتاكل اطعم زبادى بعد اربع ساعات
انا حتكلم بلغة دارجة وبسيطة عشان الكلام يوصل بسهولة
ونضرب المثال بكيلو لبن
اولا تشترى كيلو لبن جاموسى من مكان مضمون وتجربه وتتاكد انه مش رايب ... واحد يسالنى اجربه ازاى ؟
تجين شوية من اللبن بمعلقة الاكل وتغليهم على البوتاجاز تعرف ان كان رايب ولا لاء
حط اللبن على النار واما يوصل للغليان ابدأ بالتقليب المستمر لمدة 5 دقايق
شيله من على النار وحط الحاجة اللى فيها اللبن فى حاجة اكبر منها يكون فيها ميله باردة عشان تبرد اللبن بسرعة لان زى مافيه ميكروبات بتموت عند الغليان فيه ميكروبات تانية نتموت ند التبريد الفجائى
يعنى كل ماتخلى التبريد اسرع تكون الزبادى اصح واطعم
اثناء تبريد اللبن تكون بتحهز الخميرة وهى عبارة عن 2% من وزن اللبن يعنى كفاية معلقة شاى لكيلو اللبن
الحتة الصغيرة دى تدوبها كويس فى كوب زجاج حتى تصبح مثل الحليب وعشان تبقى زى الحليب حط لها
شوية لبن من اللى انت غلتهم
بعد كدة فضيهم على كيلو اللبن وقلب الاتنين مع بعض ومتزودش فى الخميرة لان المعلقة دى
المفروض انها تكفى 5 كيلو لبن
فى النهاية تحط اللبن ده فى الحضان بتاع الزبادى... واحد حيقولى يعنى ايه حضان ؟
اقوله انا مش لسة حفهمك يعنى ايه حضان والقصة الطويلة دى لكن حوصفهولك بالبلدى
لو عندك كرتونة تليفزيون 14 دى ممكن تنفع حضان تمام و 100%
حتعملها ازاى ؟ الموضوع سهل جدا حط فيها لمبة 100 وات ووصلها بسلك وخليها عند سقف الكرتونة
زى اللمبة اللى فى الاوضة او الصالة بالظبط بس اوعى اللمبة تلمس الكرتون الا تعمل حريقة والله
واقفل الكرتونة بشكل محكم وشغل اللمبة 30دقيقة فقط وبعد كدة اطفى اللمبة
لكن ما تفتحش الكرتونة ( اللى هى الحضان ) الا بعد اربع ساعات حتلاقى الزبادى تمام
حطها فى الثلاجة على الشبكة اللى تحت الفريزر مباشرة لمدة ساعة

وكل اطعم زبادى لكن خد بالك انا بقول تشغل اللمبة 30 دقيقة على اساس الجو الحار اللى احنا فيه اليومين دول من شهر 8 لكن كل الجو ما يبرد انت محتاج تشغل اللمبة اكتر ولو الحضان كان كبير محتاج لمبة اكبر يعنى انت مع الوقت والتكرار حتعرف الفرق بين الصيف والشتاء ومسحات الحضان

والسلام عليكم ورحمة الله وبركاته